Nunanut allanut nuussineq
BankNordik aqqutigalugu nunanut allanut aningaasanik nuussineq ajornaallunilu sukkasuumik isumagineqarsinnaavoq, akiliinermilu paasissutissat tamarmik eqqortuusimappata akiliinerup apuuffissaminut apuunnissaa qularutigissanngilat.
Nunanut allanut nuussineq Netbankikkut pisinnaavoq, aammalu bankip immikkoortortaqarfiisa arlaannut saaffiginninnikkut pisinnaalluni. Inniminniinermut immersugassaq uani pissarsiarisinnaavat. Nalunaaqutaq 10:00 sioqqullugu nuussiniarlutit qinnuteqaatit tigusimagutsigu ulloq taanna nuussineq naammassineqassaaq.
Nunanut allanut nuussinermi paasissutissat suut pisariaqartinneqartarpat?
Nunanut allanut nuussinermi paasissutissat eqqortut atornissaat pingaaruteqarpoq. Pingaarnerpaat ataani taakkartorneqarput.
- IBAN - IBAN naalisagaavoq, tassaalluni International Bank Account Number (Nunat tamalaat akornanni kontop normua). EU-p iluani kontot tamarmik IBAN-normoqarput, aammalu EU-p avataani nunat ilaanni atugaalluni. IBAN-normu nunagisap ilisarnaataanik aallarniuteqartuaannarpoq, taavalu bankip ilisarnaataanik, naggataatigullu kontop normuanik imaqarluni. Nunani assigiinngitsuni IBAN-normut ilai takinerusarput ilaallu naannerusarlutik. Kontot tamarmik immikkut IBAN-normoqarput, bankimit kontop killiffianik ilisimatitsissummik allagarsigaangavit aammalu Netbankinni allassimasarpoq.
- BIC (Swift-kode) - BIC naalisagaavoq, tassaalluni Bank Identifier Code. BIC 8-nik 11-nilluunniit naqinnertaqartarput. Arfinillit siulliit naqinniusarput, sinnerilu naqinniunngikkunik kisitsisaasarlutik, ass. BANODKKK (BankNordik, København).
- Tigusisussaq pillugu paasissutissat - Akiliinermi tigusisussap aqqa eqqorluinnartumik allanneqarsimasariaqarpoq (kontomik tigumminnittutut nalunaarsorsimasup aqqa), taamaanngippat amerlanertigut akiliineq naammassineqarsinnaaneq ajorpoq. Kukkuneqarsimappat akiliinissamut kinguarsaataassaaq, sullissinikkullu immikkut akiliutitaqassalluni
Aningaasat qaqugu apuutissappat?
Nunanut allanut nuussinermi akileeriaatsit qinigassat arlaqarput. Aningaasat bankimut suleqatigisamut qanoq sukkatigisumik apuunnissaanni akileeriaaseq aalajangiisuusarpoq.
- Nalinginnaasumik akiliineq (SWIFT 02) - Akiliineq ullut bankip ammasarfii marluk qaangiukkaangata bankimi BankNordikip suleqatigisaanut apuussimasarpoq.
- Tuaviuussamik akiliineq (SWIFT 01) Akiliineq ulloq bankip ammasarfia ataaseq qaangiukkaangat bankimi BankNordikip suleqatigisaanut apuussimasarpoq.
- Ulloq taanna akiliineq (SWIFT 00) - Akiliineq ulloq taanna bankimi BankNordikip suleqatigisaanut apuussimassaaq. Ulloq taanna apuuttussamik akiliineq tamatigut nunanut allanut immikkoortortaqarfipput suleqatigalugu pisartussaavoq.
- EU-akiliineq - EU-p iluani aammalu nunani EØS-iusuni EUR-ip iluaniittuni akiliineq, SHA-mik aningaasartuutitaqartoq. Paasissutissat taamatut atorsinnaagutsigit akiliinerlu Netbankikkut qinnutigineqarsimappat EU-akiliinerit SEPA-tut nassiuttarpagut. Akiliineq ulloq bankip ammasarfia ataaseq qaangiukkaangat bankimi BankNordikip suleqatigisaanut apuussimasarpoq.
Aningaasat tigusisussap bankianut apuutereeraangata ullormi bankip ammaffiani tulliuttumi tigusisussap aningaasat tigusinnaagajuttarpai. Tigusisussap bankerisaa BankNordikip suleqatigisarinngikkaangagu aningaasat apuunnissaannut piffissaq sivisunerusinnaasarpoq.
Nunanut nunallu immikkoortuinut allanut aningaasanik nuussisussaagaangavit bankimi siunnersortinnut attaveqarnissaq innersuussutigiuaannarparput. Nunanik pillaanerit nunalluunniit imminni aaqqiagiinnginnerannik peqquteqarlutik aningaasanik nuussinerit akiliinerilluunniit iluatsinngitsuussagaluarpata bankip tamanna akisussaaffigissanngilaa.
Kia akiliutitai akilertarpai?
Nunat killingi qaangerlugit akiliinerni akiliutit qanoq pinissaat nassiussisup tigusisussallu isumaqatigiissutigisarpaat, akiliinernillu avitsinermi periutsit assigiinngitsut pingasuupput:
- SHA-akiliineq - Nassiussisup bankiani akiliutit nassiussisup akilissavai, tigusisussallu bankiani akiliutit tigusisussap akilissavai.
- BEN-akiliineq - Nassiussisup bankiani aammalu tigusisussap bankiani akiliutit tamaasa tigusisussap akilissavai.
- OUR-akiliineq - Akiliutit tamaasa nassiussisup akilissavai.
Akiliutit tamarmik ullormi aningaasat kontomit tiguneqarfianni akilerneqartarput. Nuussineq allamiut aningaasaataannut nuunnermik ilaqaraangat allamiut aningaasaataasa nalingat qaavatigut immikkut akiliutilerlugu akiliutigitinneqartarpoq.
Suliffeqarfiutivit sullinneqarnissaanut periarfissat paaserusuppigit?
Uunga sianerfigitigut