Bankivimmi sulisunut

Sulisitsisuulluni pikkorissunik eqeersimaartunillu sulisoqartuarnissaq nutaanillu ornigarneqarnissaq pingaaruteqarluinnarpoq. Bankivimmi sulisutta aningaasarsiornikkut naleqarnerulersitsiviusumik ingerlatsineq pikkoriffigalugulu piumassuseqarfigisariaqarpaat, taamaattumik suliffeqarfiup iluani sulisut atugarissaarnissaat pikkorissarnissamullu periarfissaqartuarnissaat sulissutigiuarparput.

Nalunngilarput suliffiup iluani avataanilu inuuneq imminnut akulerutsinnagit oqimaaqatigiissumik ingerlanneqartussaasut, aamma nalunngilarput ingerlatseqatigiiffipput siunissami aningaaserinerup silarsuaani ingerlalluassappat, sulisut atugarissaarlutillu peqqissuunissaat pingaaruteqarluinnartoq. Sulisutsinnut tunngatillugu suliniutivut ataani paasisaqarfiginerusinnaavatit.

Ilorrisimaarneq peqqinnerlu

Bankimi sulisut suliffimminnik nuannarinnillutillu tulluusimaarutiginninnissaat pingaarutilipilussuuvoq. Sulisuvut pingaarnertut isumalluutigaavut, taamaammat suliffeqarfiup iluani pissutsit nuannersuutikkumallugit siuarsaajuarpugut suleqatigiit akornanni nukittorsaataasinnaasunik aaqqissuussisarluta.

Ilisimatusarneq siuarsaanerlu

Piginnaasaqarluarneq unammillersinnaanermut pingaaruteqarluinnarpoq. Taamaattumik Bankivimmi sulisutta piginnaasatigut ineriartortittuarnissaat suliniutigisarparput, tassuunalu bankip siumut isumalluuteqarluarnissaa qulakkeertarlugu, aammali sulisut siunissami periarfissaqarluarnissaannut ikiortarlugit. Ukiut tamaasa Bankivik ilinniarnermut aningaasaliingaatsiartarpoq, nutaanik ilinniartunngortitsilluni aammalu atorfeqareersunut ilinniaqqinnissanut periarfissiisarluni, soorlu ilaatigut bankimi ilinniartuuneq aammalu ilinniartooreersunut innersuussutigisarparput Aningaasaqarnermut tunngasunik siunnersuisarneq (AU - finansiel rådgivning).

Sulisut ineriartornissaat siunertaralugu oqaloqatigiinnerit ukiumoortumik ingerlanneqartarput, tassanilu inuttut ineriartorneq ilinniaqqinnerlu eqqartorneqartarput. Sulisut soqutigisatik malillugit suliffeqarfiup iluani ingerlaqqinnissaminnut periarfissinneqartarput, tamannalu aamma Bankiviup iluaqutigisarpaa.

Bankivimmi aamma nutaaliornermi siuttoorusuppugut. Sulisutta ineriartortittuarnissaat siunertaralugu ’NordikKompetence’ periarfissaritipparput.Tassuuna ingerlatseqatigiiffitsinni inuusuttortavut pikkorissut nunat killingi qaangerlugit eqimattakkaarlutik nutaaliornermi unammisarput. Unamminermi isumassarsiorneq allatullu eqqarsarsinnaaneq pingaartitaralugit bankip niueriaasianut siuarsaataasinnaasunik nassaarsiussapput. Ukiut tamaasa eqimattat nutaat pilersinneqartarput. Unammisitsinermi pingaarnertut siunertarineqarput bankip unammillersinnaanerata nukittorsarnissaa, nunanilu avannarlermiuunerata naqissusernissaa.

Taamaasillutik bankimi sulisut tamarmik soqutigisatik aallaavigalugit suliaqaatigalutik periutsit nutaat inerisarsinnaavaat, timitalimmillu naammassisaqarlutik.