Kinaaninnut uppernarsaateqassaatit
Bankimi sullitat tamarmik - qangalili sullitat sullitallu nutaat - kinaassutsimut uppernarsaammik takutitsisussaapput. Uppernarsaatit tunniunneqartut bankimi misissorlugillu nalunaarsussavagut. Periuseq tamanna nunarsuaq tamakkerlugu aningaasanik peqquserlunnikkut isertitanik malunnarunnaarsaaneq akiorniarlugu ingerlanneqarpoq. Aningaasanik peqquserlunnikkut isertitanik malunnarsaaneq pinngitsoortinniarlugu malittarisassat malillugit aningaaseriviit tamarmik sullitamik kinaassutsimik uppernarsaataannik peqartussaapput. Inuit tamarmik inatsisitigullu pisinnaatitaallutillu pisussaatitaasut tamarmik uppernarsaateqartussaapput, ass. peqatigiiffiit aamma tassani pineqarput.
Kalaallit Nunaanni aningaaserivimmi sullitaaguit uppernarsaammik tunniussinngitsooqqusaanngilatit. Kinaassutsimut uppernarsaammik pinngikkuni banki pisussaatitaavoq kortit, kontot netbankilu matussallugit.
Kinaassutsimut uppernarsaatit naammattut suusinnaappat?
Uppernarsaammi ilaasussaapput ateq, najugaq, kinaassutsimullu normu, ass. CPR-normu. Inuit sullitaasut uppernarsaataat aamma ersarissumik assitaqassaaq. Uppernarsaataasinnaapput makku:
- Biilersinnaanermut uppernarsaat (kørekort)
- Passi suli atuuttoq
- ID-korti nunani Schengenimut isumaqatigiissummut peqataasuni oqartussaasunit tunniunneqarsimasoq
- Illersornissaqarfimmit kinaassutsimik uppernarsaat
- Politiitut sulinermi kinaassutsimut uppernarsaat
- PI ID-korti Danmarkiminngaanneersoq
- Qimaasutut nunasisimanermut uppernarsaat
ukunannga arlaannik aapperlugu:
- Sumi najugaqarnermut uppernarsaat
- Ukiumoortumik imaluunniit siumoortumik nalunaarusiaq kingulleq
- Pisortanit pisartakkat tigusimanerinik uppernarsaat
Uppernarsaatit allat
Kinaassutsimik uppernarsaataasinnaasut assiliartallit (ass. passi biilernermulluunniit uppernarsaat) qulaani taagorneqartut arlaannik peqanngikkuit ataani allassimasuni arlaat marluk assilineri nassiuttariaqassavatit.
- Sumi najugaqarnermut uppernarsaat
- Pisortanit pisartakkat tigusimanerinik uppernarsaat
- Ukiumoortumik imaluunniit siumoortumik nalunaarusiaq kingulleq
imaluunniit qulaaniittut arlaat ataaseq ataaniittut arlaannik ataatsimik aapperlugu:
- Kuisinnermik imaluunniit atertaarnermik uppernarsaat
- Katissimanermut uppernarsaat
Sullitaareersut aamma uppernarsaammik tunniussissapput
Bankimi sullitat uppernarsaateqarnissaannik inatsit malillugu sullitaareersut aamma uppernarsaataat pissarsiarisussaavagut. Taamaammat malittarisassat atuuttut malillugit uppernarsaatit nalunaarsortissimanngikkukku, qinnuigaatsigit immikkoortortaqarfitsinnut saaffiginnillutit passit, biilersinnaanermut uppernarsaatit, allaluunniit assitalik takutikkiartoqqullugu.