Aningaaserivik akiliisinnaajunnaassagaluarpat ileqqaarisut aningaasaliisullu matussuserneqarnissaat qulakkeerumallugu Garantiformuen qularnaveeqqusiissutaavoq (siornatigut Indskydergarantifondeniusimasoq). Ileqqaartumut ataatsimut ileqqaakkat EUR 100.000 angullugit nalillit Garantifondenip matussusertarpai (750.000 kr. miss.). Sullitat inuussutissarsiortullu Garantiformuenimit isumagineqartarput, tassungalu aamma ilaapput peqatigiiffiit ingerlatseqatigiiffiillu.

Tassa imaappoq banki akiliisinnaajunnaassagaluarpat aningaasaatitit tamaasa ilaaluunniit tigoqqissavatit. Eqqumaffigissavat bankimi akiitsorsimaguit suli akilersugassaasunik taakku qularnaveeqqusiinermi utertoorutissannit ilanngaatigineqassammata.

Immikkut matussusiinerit

Ileqqaakkat ilaat aalajangersimasut 100.000 euro sinnerlugu matussuserneqartarput.

• Soraarnermusiassanut kontoni ileqqaakkat, inatsisit malillugit pilersinneqarsimappata, killeqanngitsumik matussuserneqassapput
• Ileqqaakkat inatsisit malillugit isumaginninnikkut pissutsinik immikkut siunertaqarlutik pilersitaappata inuunermilu pisumut aalajangersimasumut attuumassuseqartuullutik (soorlu avinnermut, sulinermi ajoqusernermut, imlt. toqusoqarsimaneranut) taakku 150.000 euro tungaanut matussuserneqassapput (1 mio. kr. miss.), tamanna atuuppoq aningaasat kontomut ikineqarnerannit qaammatit arfinillit qaangiussimanerisa tungaannut.
• Ileqqaakkat pinerlunnikkut ajoquserneqarsimanerup kingorna imaluunniit eqqartuussivimmi eqqunngitsumik aalajangiisoqarnerata kinguneranik pisimasut 150.000 euro tungaanut matussuserneqassapput (1 mio. kr. miss.), tamanna atuuppoq aningaasat kontomut ikineqarnerannit qaammatit arfinillit qaangiussimanerisa tungaannut.
• Ileqqaakkat illuummik aalajangersimasumik pingaarnertut nammineq inuttut atukkanut atorneqarsimasumik tunisinermit pissarsiarineqarsimasut 10 mio. euro tungaanut matussuserneqartarput (75 mio. kr. miss.), tamanna atuuppoq aningaasat kontomut ikineqarnerannit qaammatit aqqaneq-marluk qaangiussimanerisa tungaannut.

Konto arlalinnik inuttaqarpat

Konto inunnit arlalinnit pigineqarpat, soorlu uiit nulialluunniit kontomik piginneqatigigukku, tamassi immikkut 100.000 euro tungaanut Garantifondenimit matussusiivigineqassaasi, tamassi immikkut pigisassinnik ileqqaarisutut naatsorsorneqassagassi.

Pappialat nalillit

Banki akiliisinnaajunnaassappat pappialaativit nalillit tigoqqinnissaannut pisinnaatitaavutit. Pappialat nalillit bankimi uninngatitat, isumagititat imlt. ingerlatitat bankip tunniussinnaanngippagit Garantiformuenip annaasatit 20.000 europ nalingata tungaanut matussusissavai (150.000 kr.), matussusiinermi inuit eqqorneqartut tamarmik immikkut 20.000 euro tungaanut utertitsivigineqassapput. Tamanna pisinnaavoq assersuutigalugu banki piginnittumik nalunaarsuinermini kukkussuteqarsimappat.

Garantiformuen sunut atuunneq ajorpa?

• Qularnaveeqqusiinermik neriorsuutit
• Checkit
• Pappialat nalillit: aktiat, aningaasaateqarnermut uppernarsaat, qularnaveeqqusiinermut uppernarsaatit obligationillu bankip nammineq pilersissimasai.
• Ileqqaasut aalajangersimasut ileqqagaataat, soorlu aningaaseriviit allat, realkreditimik taarsigassarsisarfiit, ingerlatseqatigiiffiit aningaasaliisartut, sillimmasiisarfiit pisortallu oqartussaasut.
• Uninngatitat aaqqissuussat ilaat, pituttugaaffittut piffissaliussap qaangiunnerani aningaasat ikineqarsimasut tamakkiisumik utertinneqartussaanngikkaangata.

Uninngatitanut immikkut ittunut ikisinerit ulloq januaarip 1. 2018 sioqqullugu pisimasut

Malittarisassat ulloq januaarip 1. 2018 sioqqullugu atuuttut malillugit ileqqaakkanut killeqanngitsumik matussuserneqartussanut ikineqarsimasut ulloq januaarip 1. kingorna aamma killeqanngitsumik matussuserneqartussatut inissisimassapput. Tamannali taamaallaat aningaasanut kingusinnerpaamik decembarip 31. 2017 ikineqarsimasunut atuutissaaq.

Tassa imaappoq assersuutigalugu meeqqamut ileqqaartitsivimmut kingusinnerpaamik ulloq decembarip 31. 2017 ikisimasatit killeqanngitsumik matussuserneqartussatut inissisimassapput, kisianni aningaasat ulloq januaarip 1. 2018 kingornaluunniit ikineqarsimasut uninngatitatut nalinginnaasutut matussuserneqassapput, ileqqaagaqartumut immikkut EUR 100.000-ip tungaanut (750.000 kr. miss.).

Uninngatitat immikkut ittut tassaapput meeqqanut ileqqaartitsiviit, aallartisarnissamut kontot, pigisanik agguaassinermi kontot, ilinniagaqarnermut ileqqaakkat, ineqarnermullu ileqqaakkat.

Aningaasat paareqqusat ulloq decembarip 31. 2017 eqqartuussissuserisup sullitaminut kontoaniittut ulloq tunniunneqarfissartik tikillugu tamakkiisumik matussuserneqartussatut inissisimassapput. Aningaasat eqqartuussissuserisut sullitaminut kontoanut ulloq januaarip 1. 2018 kingornaluunniit ikineqarsimasut ileqqaakkatut nalinginnaasutut matussuserneqartussatut inissisimassapput, ileqqaagaqartumut immikkut EUR 100.000 tungaanut (750.000 kr. miss.). Taamaattorli aningaasat immikkut matussuserneqartussatut inissisimasinnaapput qulaani taaneqartut aallaavigalugit.

Paasissutissat sukumiinerusut

• Garantiformuen pillugu sukumiinerusumik paasisaqarit

• ”Paasissutissat – ileqqaakkat matussuserneqartarneri pillugit tunngaviusumik paasissutissat” aajuk (qallunaatut allassimavoq)

Apeqqutissaqaruit ileqqaakkatilluunniit pillugit eqqartuerusukkuit aamma siunnersortivit attaviginissaanut tikilluaqqusaavutit.