Napparsimaneq

Napparsimalersinnaanermut sillimmasiineq, sulisinnaajunnaarnermut, ajutoornermut innarluuteqalernermulluunniit sillimmasiinerit. Napparsimanikkut ajutoornikkut sulerulussimanermilluunniit timip atorsinnaajunnaarneranit sulisinnaajunnaassagaluaruit sillimmasiinerit taaguutaat amerlaqaat. Ilumut pisariaqarpat? Ilaana - ajutoortoqarataassagaluarpat qitornatit ilaquttatillu ilanngullugit isumannaarusukkukkit sillimmasiineq pisariaqarpoq.

Inuusunnermi pisariaqartitsineq annerusarpoq

Sillimmasersimanissamut pisariaqartitsineq inuusunnermi annerugajuttarpoq, piffissami tassani illumut, ilaquttanut meeqqanullu akiliutigisartakkat annerusarmata. Siusinaartumik soraarnermusiaqalernissamut akuerisaanissaq ajornakusoorsinnaavoq - 40-llu inorlugit ukioqaraanni ajornavippasittarluni. Taamaattumik inuppassuit napparsimalerlutik sulisinnaajunnaaraangamik isertitat apparujussuarnerat misigisarpaat. Takorloorsinnaagunarparput tamatta assersuutigalugu qaammammut isertitagut 10.000 kr.-imik appariataassagaluarunik qanoq kinguneqartigissagaluarnersoq. Utoqqaliartornermi akiligassat annikilligajuttarput, akiitsut naammassillugit akilerneqarsimaleraangata, meeqqallu inersimasunngorlutik - kisianni soorunami ilaqutariinniit ilaqutariinnut nikerartarput.

Illit ilaquttatillu isumannaarlugit

Sillimmasiinerit eqqortut atorukkit ajutoortoqariataassagaluarpat illit, ilaquttatit, qitornatillu isumannannginnerussaasi. Annertorujussuanngitsumik akiliisarlutit sulisinnaajunnaassagaluaruit soraarnermusiaqartalernissavit tungaanut pisartagaqarnissat isumannaarsinnaavat - sulisinnaajunnaarneq napparsimanermik, ajutoornermik timilluunniit suleruluppallaarsimaneranik aallaaveqaraluarpat.
Sulisinnaajunnaarnermut sillimmasiinerup saniatigut aamma inuunermut sillimmasernissaq, pinartumik napparsimalernissamullu sillimmasernissaq pisariaqarpoq, aammalu immaqa peqqinnissaqarfimmut sillimmasiineq privathospitalimi suliaritinnissamik periarfissiisartoq iluarsinnaalluni. Tassunga atatillugu meeqqat aamma sillimmasernissaat eqqaamagiuk.

Tamaasa isumagereerpakka!

Ajortoqarataassagaluarpat qanoq pisoqarnissaa eqqarsaatigilluarlugu sillimmasiinerit isumagisimagukkit ajunngeqaaq. Taamaattorli eqqumaffigisassaavoq suliffigisaq aqqutigalugu sillimmasiinerit ilaat aatsaat ataavartumik napparsimalersimanermi imaluunniit siusinaartumik soraarnermusiaqartussatut akuerisaareernermi aatsaat tiguneqarsinnaasarmata. Taamaasillutik inuppassuit aningaasat tigussasorisatik tigunngitsoortarpaat, imaluunniit aatsaat kingusinnerujussuakkut tigusarlugit. Taamaammat sillimmasiinermut pensionimullu atatillugu atukkatit misissortinniarigit - ikiorsinnaavatsigit. Ilaquttatillu isumannaannissarsi siunertaammat piffissartorfigilaaraluarukku peqqissiminavianngilatit.

Peruluttumut qanigisaaneq

Qanigisamik peruluttoqartillugu eqqarsaatigisassat amerlasaqaat. Misigissutsikkut pikkunartorsiorfiusarpoq, taassumalu saniatigut aamma aningaasaqarnikkut  isumaalunnarsinnaasarluni. Ilungersunartorsiorfissinni ikiussallusi piareersimavugut, aningaasaqarnermut tunngasortaasa sapinngisamik oqinnerpaamik ingerlanissaat qulakkeersinnaavarput.

Assersuutigalugu pisinnaatitsissummik pilersitsisoqarsinnaavoq, illit qanigisaasutit napparsimasup kontoanut Netbankianullu isersinnaalersillutit. Aamma kontomut kortinnassinnaassaatit.

Napparsimasoqartillugu periarfissat pisinnaatitaaffiillu sullissivik.gl-imi sukumiinerusumik paasineqarsinnaapput.

Eqqaamagiuk aamma sulisitsisorisavit aperinissaa, nakorsiarnissamut, qanigisaasumillu isumagineqarnissamut periarfissaqarsinnaammat.