Ilaqutariit iluanni

Ilaqutaasut suliffeqarfimmik ingerlatitseqqiillutik akisussaaffeqalersut suliassaminut tulluunnissaat piareersimanissaallu assorsuaq pingaaruteqarpoq. Taamaammat suliffeqarfimmi piginnittuusup aaqqissuussilluarluni tullersortissaminut ingerlatitseqqiinissaq pilersaarusiortariaqarpaa, ikaarsaalernerlu siusissukkut aallartisarneqarpat pitsaanerussaaq.

Assersuutigalugu ukiut pingasut sisamalluunniit kingornussisussat misiliutaasumik aqutsinermut ilanngunneqarsinnaapput. Misiliummik aqutseqataasinneqarneranni assigiinngitsunik suliassaqartinneqartassapput akisussaaffilerneqarlutillu, tamanna pikkoriffiinik piumassuseqarnerannillu qulaajaaqataassaaq.

Misiliiffiup nalaani aamma ikaarsaarnerup iluatsilluarnissaa anguniarlugu ilisimasaqarluartunik avataaneersunik siulersuisuniluunniit ilaasortanik attaveqanngitsunik siunnersorteqarnissaq periarfissaavoq

Suliffeqarfimmi piginnittut nikinnissaannut siunnersuutit

Kingornussisussaq aqutsinikkut misilittagaqarnissaanut periarfissiguk, tassuunalu pikkoriffii sanngiiffiilu ilisimalerlugit. Kingornussisussap sanngiiffiini allamik immikkut aqutsisoqartitsineq periarfissaavoq
Siunnersuisinnaasunik ikiortissarsiorit, soorlu revisorinik, advokatinik, il. il.
Suliassat agguataarneqarnerat ersarissumik nalunaarsukkit, massakkut piginnittup kingornussisussallu suliassai immikkoortilluarlugit
Kinguaariit nikinnissaannut periusissamik pilersaarusiorit, sapinngisamik kingusippallaanngitsukkut. Assersuutigalugu kingornussisussaq suliarisassinnut attuumassusilimmik aqutsinermulluunniit tunngasumik ilinniagaqarnissaanut periarfississinnaavat