Ima qinnuteqassaatit

Qinnuteqarniarneq CV-liornerlu ajornanngitsuinnaanngilaq. Qinnuteqaammi sooq qinnuteqarnerlutit oqaatigissavat, aammalu suliffiginiakkanni qanoq tunniussisinnaanerlutit allaaserissallugu.

BankNordikimi aningaaserinermut ilinniartunngorniaruit illit pillutit paaserusutavut arlaqarput, taamaammat qinnuteqaatinnut siunnersuutissaqartippatsigit.

Qinnuteqaleruit malitassaqqissut

• Naatsumik erseqqissumillu allagit
• Imminut ilisaritigit BankNordikimullu sooq qinnuteqarnerlutit tunngavilersorlugu
• Pikkoriffitit allaaserikkit. Itisiliillutit assersuusiorsinnaavutit
• Sunngiffimmi susarnerlutit, suullu soqutiginerlugit allagit
• Qinnuteqaatinni ilumoorsaarnerit takutissavat, aamma kinaassutsinnik takutitsisunik imaqarsinnaavoq
• Ilinniarnikkut naammasseriikkatit allaaserissavatit, sunngiffimmi suliffigisimasatit aamma ilanngussinnaavatit
• Atuarfimmi fagit sorliit soqutiginerlugit, sorliillu pikkoriffiginerlugit allagit
• Ilinniarfigisimasannit uppernarsaatit, karakteerit, oqaaseqaatillu kakkiutikkit
• Eqqaamallugu atit, najukkat, inuuiit, tlf. normullu ilanngutissagakkit, e-maileqaruillu aamma taanna. Assit ilanngukkukku iluassaqaaq.
• Qinnuteqaatip annerpaamik qupperneq ataaseq ulikkaassavaa - naannerusinnaavoq.

CV-liornermi malitassaqqissut

• Erseqqissumik takussutissiillutit kinaanerit, suliatigut misilittakkatit, ilinniakkatillu takutikkit. Pikkoriffivit angusimasavillu erseqqissumik naatsumillu allannissaat pingaaruteqarpoq.
• Piginnaasat allat kinaaninnik suliatigullu piginnaasannik takutitseqataasinnaasut ilassutitut allattukkit, soorlu qarasaasiap atornissaanut piginnaasat, oqaatsit, inuttullu soqutigisatit. Qinnuteqartut arlaqaraangata immikkuullarissunik soqutigisallit eqqaamajuminarnerusinnaasarput.
• Pikkoriffitit misilittakkatillu uppernarsarlugit kakkiussigit. Tassaasinnaapput sulisitsisukunit innersuussinerit, pikkorissarnernit allagartat, suliarisimasalluunniit uppernarsarneqarnerat.