Kinguaariit nikinnerat
Kinguaariit nikinnerannik oqaraangatta imaaginnanngilaq ilaqutariit ataatsit iluanni utoqqaanerusunit kinguaariit tulliannut ingerlatitseqqiineq. Suliffeqarfik aningaasaliisartumut allamut suliffeqarfimmulluunniit allamut tunineqarpat aamma kinguaariit nikinnerattut oqaatigineqarsinnaavoq. Kinguaariinni nikinneq suugaluarpalluunniit suliffeqarfimmi piginnittoq piginnittussamut allamut ingerlatitseqqiinermini eqqumaffigisassai eqqarsaatigisassaalu amerlaqaat.
Nalinginnaaneruvoq
Suliffeqarfik aningaasaliigallarnertut piffissami aalajangersimasumi ingerlatitsinertut isigineqarnera nalinginnaanerulernikuuvoq, suliffeqarfinnik piginnittut amerlasuut ingerlatitseriarlutik allanut ingerlatitseqqiineq imminut akilersinnaalluarpat ingerlateqqittarpaat. Assersuutigalugu inuussutissarsiortut allamik suliffeqalerusullutik, suliffeqarfiutitaarusullutik allamilluunniit pilersaarlutik suliffeqarfimminnik tuniniaasut takussaanerulernikuupput. Aamma ilaqutariit iluanni kinguaariit tulliuttut suliffeqarfimmik ingerlatitseqqiinissartik piumanagu suliffeqarfiup allanut tunineqartariaqarnera takussaagaluttuinnarpoq.
Suliffeqarfimmik allamik pisineq
Suliffeqarfiit suliffeqarfimmik allamik pisippat kinguaariit nikinnerattut oqaatigineqarsinnaavoq. Taamaaliornermi suliffeqarfimmik allamik tigusinissamut piareersarluarnissaq pingaaruteqarpoq, aammalu suliffeqarfiutivit nukittuujunissaa pingaaruteqarluni.
Suliffeqarfiit marluk kattunniarnerat sivisusinnaavoq. Taamaammat nassuiarluarsinnaasariaqarpat suliffeqarfik pisiariniakkat ukiut tallimat qulilluunniit qaangiuppata suli iluarinartumik tapiissuteqartarnissaa naatsorsuutiginerlugu.
Suliffeqarfimmik ingerlalluartumik pisineq iluaquterpassuaqarsinnaavoq. Assersuutigalugu sullitat nutaat isertitassallu nutaat, aammalu sulisut misilittagartuut nutaat suliffeqarfimmiilersinnaapput, immaqalu tunisassiornermut maskiinat iluartut inillu pitsaasut. Unammillertinnik pisissaguit aamma niuerfimmi akuunerit annertuseriassaaq.
Suliffeqarfiutivit sullinneqarnissaanut periarfissat paaserusuppigit?
Uunga sianerfigitigut