Suliffeqarfimmik aallartitsineq - isumassarsiaaneranit piviusunngornissaanut
Takorluugaqarpit piviusunngortikkusutannik? Angusaqarusuttuuit? Taamaappat isumassarsiavit eqqarsaataannaajunnaarluni piviusunngornissaanut periarfissaqarluarputit - namminersorlutit suliffeqarfiutitaarniarit.
Pissanganarlunilu sukataarnartarpoq
Piumassuseqarluarneq, uteriitsuuneq piumassuseqarnerlu namminersortutut ingerlatsinermi pingaaruteqarput. Kisianni aamma inuttut aningaasaqarnikkullu tunniussisinnaasariaqarputit. Suliffinni nammineq pisortaassaatit, eqqumaffigissavalli sulineq nal. 8-16-ip iluani taamaallaat pinavianngimmat. Suliniutigisaq piffissartornarsinnaasarpoq, taamaammallu ilaquttanut, ikinngutinut sunngiffimmilu sammisassanut piffissakinnerunarsinnaalluni.
Aningaasaqarnertaa
Namminersortuuneq aningaasaqarnikkut unamminarsinnaavoq, qaammatip tulliani isertitassatit nalunarsinnaammata. Aalajangersimasumik isertitaqarneq atugassaqartitaanerlu sungiusimagukkit namminersortuulluni nalorninartut sinissaarunnarsinnaapput.
Namminersorusullutit isumassarsiatit aningaasalersorneqassappata tigussaasunngorlugit nassuiaqqissaarlugit pilersaarusiortariaqassavatit. Tamatumuuna misissuilluarneq piareersarluarnerlu qitiulluinnarput.
Ingerlatseqatigiiffiup ilusilersugaanera
Suliffeqarfimmik aallartitsiniaruit qanoq ilusilersugaappat ilinnut suliffeqarfiutinnullu tulluarnerussanersoq eqqarsaatigissavat. Firma kisermaassaassava, piginneqatigiiffiussava imaluunniit aktianik piginneqatigiiffiussava?
Iluseq sorleq qinernerit apeqqutaalluni aallaqqaatissatut aningaasaliissutit assigiinngillat. Aallaqqaatissatut aningaasaliissutit, malittarisassat allallu sullissivik.gl-imi atuarsinnaavatit.
Pilersaarusiorit
Aningaasaliiffigineqarnissamut pisariaqartitatit ilisimagukkit, namminerlu suliffeqarfimmi sanaartornermut aningaasaqarnermullu qanoq aningaasalersuisinnaatiginerlutit nalunagit, taava pilersaarusiut suliarisinnaassavat. Pilersaarusiut sakkussaqqillunilu siunissami aningaasaliisinnaasunik oqaloqateqarniaruit pisariaqarpoq.
Pilersaarusiut suliffeqarfiup suuneranik nassuiaataallunilu qanoq ingerlanneqarnissaanut ineriartortinnissaanullu pilersaarusiaavoq. Suliffeqarfiup ilisserutaanik taasinnaavarput, tassanilu suliffeqarfiup suunera anguniagaalu erseqqissarneqarput. Pilersaarusiuteqaruit aamma suliatit allanut paasiuminarnerussapput, anguniakkatillu erseqqinnerullutik.
Pilersaarusiummiittussaapput paasissutissat makku: aningaasalersuineq, aaqqissuunneqarneq, tuniniaaneq, avammut nittarsaassineq ineriartornissamullu periarfissat.
Qanoq aallartissanerlutit nalorniguit uatsinnut attaveqarnissannut tikilluaqqusaavutit.
Suliffeqarfiutivit sullinneqarnissaanut periarfissat paaserusuppigit?
Uunga sianerfigitigut