Siunnersuineq aningaasaliinerlu
Suliffeqarfimmik aallartitsisimaguit namminersortuulluni suliffeqarnissap nuannerunartua peqqutigiunnarsivat. Naatsorsuuserineq, akileraarutit, sillimmasiinerit assigisaallu pissutaajunnanngillat.
Isumagisassanut ikiuutit
Taamaakkaluartorli pappialarsornikkut allatigullu isumagisassat suliarilluagaanissaat pingaaruteqarpoq. Tamakku arlaatigut amigarpata suliarinerlutaappataluunniit suliffeqarfinnut assut kingunerlutsitsisinnaavoq. Suliassaq tamanna nammineerlutit suliarisinnaanngikkukku revisorimut siunnersoqqunissaq innersuussutigaarput.
Suliffeqarfimmik pilersitsinermi siunnersuutit
- Aallaqqaatissatut atorsinnaasannik aningaasanik ileqqaagaqarit
- Erseqqissumik pilersaarusiorit, anguniakkatit taakkartorlugit qanorlu anguniassanerlugit nassuiarlugu
- Pisariaqartitsigaangavit apersorlutit siunnersoqqusarit, attavissatit nalunngisatillu atorluartakkit
- Isertitat aningaasartuutillu tamaasa allattukkit, suliffeqarfiup aningaasaqarnera nakkutigiuminarnerussaaq
- Aningaasaliisussatut piukkunnartunik naapitsileraangavit piareersarluartarit. Isumassarsiaqarneq kisimi naammanngilaq - suliniut ataavartuusinnaasariaqarpoq ineriartornissamut periarfissaqartitsisoq
Aningaasaliineq tapiissutaasinnaasullu
Suliffeqarfimmi aningaasaliineq siulleq nammineq ileqqaakkanit nalunngisanilluunniit ilaquttanilluunniit suliannik upperinnittunit pigajuttarpoq. Bankimit aningaasalersorneqarneq kingusinnerulaartukkut pigajuttarpoq, suliffeqarfiup atasinnaanera ineriartorsinnaaneralu erseqqinnerulersimappat.
Kalaallit Nunaanni suliffeqarfiit Vækstfondenimut tapiiffigeqqullutik qinnuteqarsinnaapput. Soorlu assersuutigalugu banki allalluunniit suliffeqarfinnik aningaasalersuisimappata taakkununnga Vækstfonden ineriartornermut akiliussisussamaataanermik tunniussisinnaavoq. Aningaasaliineq ikiorneqarnerlu pillugit Vækstfondip nittartagaani paasisaqarnerusinnaavutit.
Greenland Business Naalakkersuisut sinnerlugit aaqqiissutit assigiinngitsut ingerlappaat. Taakkua ilagaat klippekorteqartitsineq, siunnersuisartumit ilisimannilluartumit siunnersorneqarnissamik periarfissiisoq. Klippekorti atorlugu aningaasartuutit atorneqartut 100 %-imik taarserneqassapput, taamaattorli annerpaamik 25.000 kr.-qassaaq. Klippekorti Kalaallit Nunaanni namminersortunut periarfissat ilaannaraat. Greenland Businessip nittartagaani periarfissat allat takuneqarsinnaapput.
Innersuussutit atorluarneqarsinnaasut:
Suliffeqarfiutivit sullinneqarnissaanut periarfissat paaserusuppigit?
Uunga sianerfigitigut