BankNordikip matut ammaqqippai

Sullitat, sulisut, aammalu Kalaallit Nunaanni inuiaqatigiit tamaasa sianigilluarusuppavut. Taamaammat martsip 19.-ninngaanniit naalakkersuisut peqqinnissaqarnikkullu oqartussaasut innersuussutaat malillugit COVID-19-ip tuniluussinnaanera annikillisarumallugu assigiinngitsunik iliuuseqarsimavugut. Ilaatigullu immikkoortortaqarfitta matui matoqqatissimavagut.

Nuannaarutigaarput maanna inuiaqatigiit mianersortumik ammariartuaarneqarnissaat nalunaarutigineqarsimammat. Tamannalu pissutaalluni ataasinngorneq apriilip 27. aallarnerfigalugu nalinginnaasumik ammasarfigut atuleqqissavagut. Kisianni nappaatip sullitanut sulisunullumi tuniluussinnaanera annikillisarumallugu killilersuilaarnikuuvugut akisussaassulimmillu pissusilersornissaq assut pingaartillugu.

Sullitat ornigussinnaaleqqinnerat nuannaarutigigaluarlugu innersuussutigaarput immikkoortortaqarfimmut saaffiginninnerit sapinngisamik killeqartinnissaat. Kiffartuussiviit nammineerluni atoriaannaat soorlu Netbank, Mobilbank, aningaasanillu tigusisarfiit sapinngisamik atorneqarnissaat innersuussutigaarput, aammalu ataatsimiinnerit sapinngisamik internetikkut telefonikkulluunniit ingerlanniarlugit.

Ataatsimiinnerit immikkoortortaqarfitsinni pigaangata peqqinnissaqarfiup innersuussutai malinneqassapput, qanillivallaarnaveersaarluni, eqqiluisaarluni, imminnullu sianigaluni pissuseqarluni, ataatsimiinnerlu siumut isumaqatigiissutigeqqaarlugu pisassalluni.

Bankip pitsaanerpaamik isumannaannerpaamillu atornissaanut ilitsersuut:

• Bankip aningaasanik tigusisarfiutai nalinginnaasumik atorneqarsinnaapput
• Netbank Mobilbankilu nalinginnaasumik atorneqarsinnaapput
• Bankimi ataatsimiittussaavit? Ataatsimiinnerup internetikkut ingerlanneqarnissaa innersuussutigaarput. Internetikkut bankimi ataatsimiinneq pillugu uani paasisaqarnerusinnaavutit
• Piffinni ukunani telefon 34 79 00-imut sianerfigisinnaavatsigut: ataasinngornermit sisamanngornermut nal. 9.30-15.30 kiisalu tallimanngornikkut nal. 9.30-15
• Siunnersorti pisarnittut attavigisinnaavat netbankikkut, telefonikkut, e-mailikkulluunniit

Nittartagarput Facebookimilu quppernerput nutarsarneqallattaasarpoq, pissutsit malillugit periuserput allanngortissagaluarutsigu tassuuna nalunaarutigiumaarparput.

Sullitatta naapeqqinnissaat qilanaaraarput – peqatigiilluta, immitsinnulli qanillivallaarata, isumatusaarlutalu.