BankNordikip ineriartorluarnera COVID-19-imit sunnerneqarpoq

Ingerlatseqatigiiffimmi BankNordikimi ukioq aallartilluarpoq, ukiup sisamararterutaani siullermi isertitat qaffariartissimavaat aningaasartuutillu appartillugit. Appartitsinerit sioqqullugit ingerlatsinerup inernera 2019-imi piffimmut tassunga sanilliullugu 65%-inik pitsanngoriarsimavoq. Tunngaviusumik isertitaqarnikkut ingerlalluaraluarluni COVID-19-ip kingunerisa sunniutai annertunerupput.

”Naak ukiup sisamararterutaani siullermi ingerlatsinerup inernera coronartoqarneranit assorsuaq sunnerneqaraluartoq ukiormanna qaammatini siullerni pingaarnertut suliatta ineriartorsimanerat naammagisimaarutigaarput. Sullitat eqeersimaarnerat annertusiartorpoq, sullitanillu nutaanit ornigarneqarluta, taamaammat Kalaallit Nunaanni niuernerput ingerlatseqatigiiffiup tamakkiisumik inerneranut iluaqutaaqaaq,” Árni Ellefsen, BankNordikimi pisortaaneq oqarpoq. BankNordikip Kalaallit Nunaanni isertitaat 2019-imi ukiup sisamararterutaani siullermi 11 mio. kr.-usimasut qaffariarsimapput, taamaasillutillu 2020-mi qaammatini siullerni pingasuni 15 mio. kr.-iullutik. Tassuuna ersersinneqarpoq Kalaallit Nunaata niuerfiani ingerlanera ineriartorluartoq.

Ikiorsiissutissat pillugit sullitat qanimut attavigineqarput

Ulluni makkunani peqqinnissaqarnikkut ajornartoornerup kinguneri ilaatigut aningaasaqarnermut kinguneqartitsipput aammalu ulluinnarni pissutsinut sunniuteqarluni, tamakkulu pillugit BankNordikip sullitani privatit inuussutissarsiortullu qanimut attavigillattaasarpai. “Sullitatta ilarpassui coronavirusip kingunerinit ilungersunartorsiornerit massakkumut pisimasut qaangernissaannut aningaasaqarnikkut isumalluutissaqarluarput. Taamaattorli aamma sullitanik arlalinnik COVID-19-imut atatillugu ikiorsiissutissanik atuerusuttunik oqaloqateqarsimavugut. Sullitat tamarmik immikkut atugaat pisariaqartitaallu aallaavigalugit naliliinerit pisarput, qaammatillu arfinillit tungaannut taarsigassarsianut akilersuinerit kinguartikkallarneqarsinnaasarput.” Árni Ellefsen oqarpoq.

COVID-19 pillugu ilisimatusarnermik tapersersuineq

Coronavirus nunani tamalaani peqqinnissaqarfinnut, aningaasaqarnermut tunngasunut, inuiaqatigiinnullu assigiinngitsutigut ilungersortitsisimavoq siornatigut misigisimanngisatsinnik. Virusip nungutinniarneqarnissaanut siunissamilu assingusunik pisoqaqqinnissaa pinngitsoortinniarutsigu COVID-19-imut tunngasunik ilisimatusartoqarnissaa pisariaqarpoq. Nappaassuup tuniluuttup ili-simaneqarluarnerunissaanut BankNordik tapersersueqataarusuppoq, taamaammallu ilisimatusaatinut COVID-19-imut tunngasunut 1 mio. kr.-inik tapiissute-qarsimalluni.

Coronartoqarnerata sunniutipiluinut isumalluutissaqarluarpoq

Coronartoqarnera peqqutaalluni ukiormanna qaammatit siulliit pingasut inernerat miinusiuvoq, pingaarnertullu pissutsit pingasut tassunga peqqutaapput: 25 mio. kr.-it nappaatip kingunipiluinit annaasanut isumalluutissatut aalajangiunneqarnerat, pappialat nalillit bankip nammineerluni pigisaasa nalingat sakkortuumik allanngorarsimanerat, kiisalu ajutoortoqarnera peqqutigalugu bankip sillimmasiisarfittaanit taarsigassarsiassanut aningaasartuuterpassuit. Pissutsit tamakku atuukkaluartut BankNordik nappaassuup kingunerinit ilungersunartorsiornissaminut isumalluutissaqarluarpoq. Ukiup sisamararterutaasa siulliat qaangiummat akiliisinnaassusaa qaffariarsimavoq 23,4%-iulerluni, 2019-ip naanerani 22,3%-iusimavoq, taamaasillunilu akiliisinnaassusaa inatsisitigut piumasaqaatinit 14%-pointinik qaffasinneru-voq.

2020-mi qaammatini siullerni pingasuni naatsorsuutit inerneri pingaarnersiukkat

• Akileraarutit sioqqullugit inernerat tassaavoq -30 mio. kr., 2019-imi piffimmi tassani 65 mio. kr.-uvoq.
• Appartitsinerit sioqqullugit ingerlatsinerup inernera 45 mio. kr.-uvoq, 2019-imi piffimmi tassani 31 mio. kr.-uvoq.
• Taarsigassarsiarititanik appartitsinernik utertitsineq ilanngaatissat ilanngaatigereerlugit -24 mio. kr.-uvoq, 2019-imilu piffimmi tassani 19 mio. kr.-ulluni.
• Ingerlatsinerup inernera 22 mio. kr.-uvoq, siornalu piffimmi tassani 50 mio. kr.-ulluni.
• Bankip taarsigassarsisitsinera 10 mia. kr.-uvoq, 2019-imi piffimmut tassun-ga naleqqiullugu allanngorsimanngilaq.
• Bankip uninngatitai 2019-imi qaammatini siullerni pingasuni 14 mia. kr.-usimasut appariarsimapput, 2020-milu qaammatini siullerni pingasuni 12, 9 mia. kr.-ulersimallutik.
• Akiliisinnaassusaa 2019-imi qaammatini siullerni pingasuni 19,2%-iusoq, 2020-mi piffimmi tassani 23,4%-inut qaffariarsimavoq.
• Siulersuisut naatsorsuutigaat ilanngaatissat ilanngaatigereerlugit inernerat 30-80 mio. kr.-ip nalaaniissasoq (Ukiup aallartinnerani naatsorsuutigisi-masanit 70 mio. kr.-inik appasinnerulluni).

Paasissutissat sukumiinerusut 
Árni Ellefsen, pisortaaneq, tlf: +298 230 348