BankNordikip uninngatitaqarnermut atugassarititaasut allanngortilerpai

Sullitanut privatinut uninngatitaqarnermut erniat qaffanneqassapput, ernianullu aningaasartuutaasunut killiliussaq appartinneqarluni. Allannguutit niuernikkut pissutsinik peqquteqarput.

Ulloq 1. februar 2021 aallarnerfigalugu sullitanut privatinut uninngatitaqarnermut erniat -0,75 %-imit -0,6 %-inut qaffanneqassapput. Taamatuttaaq aningaasartuutaasumik ernialerneqarnissamut killiliussaq 500.000 kr.-iugaluartoq appartinneqassaaq 250.000 kr.-iulerluni.

Sullitaq aningaasartuutaasumik ernialerneqarnianngikkuni annerpaamik pingasunik uninngatitanut kontoqarsinnaavoq, kontonilu taakkunani ataatsip imarisai 250.000 kr.-it ataanniissapput, sinnerilu marluk immikkut annerpaamik 50.000 kr.-inik imaqarsinnaallutik. Aningaasat uninngatitat killiliussat taakku sinnerpagit, aningaasat killiliussanik sippuisut aningaasartuutaasumik ernialerneqassapput -0,60 %-imik. Sullitaq pingasut sinnerlugit kontoqarpat kontot sinneruttut aningaasartuutaasumik ernialerneqassapput.

Ulloq 1. februar 2021 aallarnerfigalugu pensionimut kontoni erniarititat aamma -0,75 %-init -0,60 %-inut qaffanneqassapput, tassanilu aningaasat uninngatitat tamarmik ernialerneqassapput.

Meeqqat inuusuttullu minillugit

Meeqqat inuusuttullu 29-t inorlugit ukiullit aningaasartuutaasumik erniaqartinneqarneq ajorput, taamaammat allannguutit uku taakkununnga atuutinngillat.