![](/-/media/banknordik/images/filialer/gl/169_nuukfilial_cd_gl.jpg?rev=-1&mw=1600&hash=AE302CE26F96457636FC6E486625B566)
Pinerlunnikkut aningaasanik malunnarunnaarsaanermik peqqarniisaarnermillu aningaasaliinermik pinaveersaartitsineq
Aningaaserivittut BankNordik pinerlunnikkut aningaasanik malunnarunnaarsaanermut inatsimmik malinnittussaatitaavoq. Inatsit taanna pinerlunnikkut aningaasanik malunnarunnaarsaanermik peqqarniisaarnermillu aningaasaliinermik pinaveersaartitsineq siunertaraa. Inatsimmi § 38 naapertorlugu banki, siulersuisui sulisuilu tamarmik nipangersimasussaatitaapput, taamaammallu pissutsinut ataasiakkaanut tunngatillugu oqaaseqarsinnaatitaanatik. Nipangersimasussaatitaaneq piffissamut aalajangersimasumut killeqanngilaq, unioqqutikkaannilu tamanna pillarneqaataasinnaalluni. Taamaammat pissutsinut taamaattunut atatillugu tusagassiortut suliat aalajangersimasut pillugit apeqqutissaqaraangata taakku akisinnaanngilagut.
Pinerlunnikkut aningaasanik malunnarunnaarsaaneq peqqarniisaarnermillu aningaasaliineq ima pinaveersaartittarpagut
Ataatsimut isigalugu bankimi pinerlunnikkut aningaasanik malunnarunnaarsaanermik peqqarniisaarnermillu aningaasaliinermik pinaveersaartitsineq pisarpoq aningaasanik nuussinerit nalinginnaasunit annertunerusut, ippinnaateqarsinnaasut allatulluunniit aningaaserinermut tunngatillugu inatsisinik unioqqutitsinermik imaqarsinnaanerat nalorninaateqartikkaangatsigu tunuliaqutaanik siunertaanillu misissuinikkut.
Suliap siunertaa tassaavoq aningaasanik nuussinerit pinerlunnikkut aningaasanik malunnarunnaarsaanermut peqqarniisaarnermilluunniit aningaasaliinermut attuumassuteqarsinnaaneranik pasitsaassisoqarsinnaanersoq nalilissallugu. Misissuinitsinni pasinarsinnaasunik maluginiagaqarsimagaangatta Statsadvokaten for Særlig Økonomisk og International Kriminalitetimut (SØIK) nalunaartussaatitaavugut. Nalunaartussaatitaanerput taanna atuuppoq sullitap banki aqqutigalugu nuussinera sioqqullugu kingornaluunniit pasitsaassineq pigaluarpat.
Aningaaseriviit allat assigalugit pinerlunnikkut aningaasanik malunnarunnaarsaanermut peqqarniisaarnermilluunniit aningaasaliinermut attuumassuteqarsinnaasunik pasitsaassaqaraangatta SØIK-mut nalunaarutigisarpagut. 2020-mi suliat assigiinngitsut 176-it SØIK-mut nalunaarutigaagut, Danmarkimilu aningaaseriviit tamarmik iluanni katillugit suliat 60.000-inik sinnillit nalunaarutigineqarsimallutik.