2023-mi angusat naammaginartut

Ullumi 2023-mi naatsorsuutit inerneri avammut saqqummiunneqarput. Ataatsimut isigalugu ukiumi qaangiuttumi ingerlatseqatigiiffiup suliaqarfiini tamani siuariartorneq takussaavoq.

Angusaqarluarnitsinnut pingaarnertut peqqutaapput erniatigut pissutsit iluatinnartut, uninngasuutitsinnit iluanaarnerit kiisalu appartitsinerit annikitsut. Tamakku tamarmik sullitatta patajaatsumik aningaasaqarnerannik takutitsisuupput.

 

Kalaallit Nunaanni immikkoortortaqarfitsinni angusat pitsaasut

Kalaallit Nunaanni immikkoortortaqarfitta naatsorsuutaasa inernerat ilanngaatit sioqqullugit 38 mio. kr.-uvoq. Tamatuma saniatigut taarsigassarsiat uninngatitallu qaffariarsimapput, aammalu siornatigut sullitarisimanngisagut arlallit uatsinnut nuussimallutik.

”Kalaallit Nunaanni immikkoortortaqarfitta siuariartornera assut naammagisimaarutigaarput. Naatsorsuutit inerneri naammaginartut saniatigut 2023-mi erniat qaffariarnerat malunniutillit pingaarnerit ilagisimavaat, kisianni takusinnaavarput sullitatta aningaasaqarnerat patajaatsuusimasoq, tamannalu soorunami nuannaarutigaarput. Piffimmi sorpassuartigut allanngorarfiusumi sullitanik privatinik inuussutissarsiortunillu siunnersuisinnaaneq imaannaanngilaq, taamaammat Kalaallit Nunaanni pikkorissorsuarnik misilittagartuunillu sulisoqarnerput assut tulluusimaarutigaara,” Turið F. Arge, pisortaaneq, oqarpoq.

Erniat aningaasartuutaajunnaarlutik aningaasarsiffiulermata sullitat arlallit ileqqaakkatik kontomut iluatinnartumik erniaqartumut ikisalersimavaat. 2023-mi sullitat arlallit ileqqaakkatik iluanaarfiginerujumallugit periarfissaq tamanna atorsimavaat. Ukiumi 2023-mi bankimi sullitanik siunnersuinitsinni uninngatitanut konto iluatinnartoq pillugu paasissutissiineq eqqartorneqarnerit ilagisimavaat.

Sullitanut tamanut Netbank akeqanngitsoq

Ukiumi qaangiuttumi bankimi akit akiliutillu assigiinngitsut naliliivigalugillu allanngortitersimavagut, ilaatigullu akiliutinut tunngatillugu aaqqissuunneqarnerput oqilisaavigiumallugu akiliutit arlallit atorunnaarsissimallugit. Assersuutigalugu Kalaallit Nunaanni siullersaalluta aalajangiussimavarput Netbank sullitanut privatinut tamanut akeqassanngitsoq.

”Periarfissaatigut digitaliusut pitsanngorsarlugillu inerisartuarniartarpagut, taamaasillutik sullitavut nammineerlutik aningaasaqarnertik malinnaavigisinnaaniassammassuk, bankimilu isumagisassatik arlallit isumagisinnaallugit. Ass. Netbanki sullitatta ulluinnarni atortorujussuuaat, siunissamilu aamma periarfissat digitaliusut allat atorsinnaalertussaallugit. Periarfissat digitaliusut atorniarneranni akiliutit akornutaasussaanngillat, taamaammallu aalajangiupparput Netbank sullitanut privatinut tamanut akeqassanngitsoq,” Turið F. Arge, pisortaaneq, oqarpoq.

2024 pillugu neriulluarpugut

Ukiumi qaangiuttumi naatsorsuutit ajunngitsumik inerneqarput, sullitattalu aningaasaqarnerat patajaalluni, taamaammat 2024 eqqarsaatigalugu atugassarititaasut ilimasuutillu ajunngitsutut oqaatigineqarsinnaapput. Naak erniat 2023-mi assorsuaq qaffariarsimagaluartut erniat qaffaqqinnissaannik takussutissaqanngilaq – akerlianik ilimasuutigineqarpoq ukiup ingerlanerani erniat appariarnissaat, kisianni appariarnerit siorna pissutsinut naleqqiullugit taama sakkortutigissanngillat.

”Naak ilimasuutit annerusumik ajunngikkaluartut appartitsinerit ukiunut kingullernut arfineq-marlunut naleqqiullugit amerlanerunissaat naatsorsuutigineqarpoq. Tassunga peqqutaavoq pissutsit allanngorsimanerisa sunniunnerulernissaannik ilimasunneq, tassa imaappoq naak sullitavut erniat qaffariarnerisa nalaanni akiuussinnaassuseqarluarsimagaluartut pissutsit allanngorsimanerat malunniuttussanngorpasimmata. Kisianni angusat kusanartut, sullitat patajaatsut, siunnersortillu pikkorissut misilittagartuullu pigigallartillugit neriulluarpugut, sulilu Kalaallit Nunaanni ineriartorsinnaanerput pillugu aamma ilimasuuteqarluarluta,” Turið F. Arge, pisortaaneq, oqarpoq.

Tulliani nalinginnaasumik ataatsimeersuarnissami siulersuisut siunnersuutigissavaat 2023-mi pissarsianik katillugit 80 mio. kr.-inik nalilinnik aktiaatilinnut agguaassisoqassasoq. Pissarsiat taakku ilanngaatit sioqqullugit iluanaarutit 26%-iisa naligai, taamaasillunilu pissarsianut politikkiusartumit 70%-iusumit allaanerulluni. Allaaneruneranut peqqutaavoq Savalimmiuni Kalaallit Nunaannilu illuutit suliffeqarfiillu illuutaat pillugit Finanstilsynimut tusarniaaneq massakkut ingerlasoq, tusarniaanerup inernera bankip aningaasaateqarneranut sunniuteqarsinnaammat. Bankip naatsorsuutigaa ukioq manna qiteqquppat suliaq taanna pillugu akissutisisimassalluni.

Ukiumut naatsorsuutit inerneri pingaarnersiukkat

  • Akileraarutit sioqqullugit inernerat tassaavoq 308 mio. kr.

  • Appartitsinerit sioqqullugit ingerlatsinerup inernera 269 mio. kr.-iuvoq

  • Taarsigassarsiarititanik appartitsinernik utertitsineq 10 mio. kr.-iuvoq

  • Bankip taarsigassarsisitsinera 8,9 mia. kr.-uvoq

  • Bankip realkreditimik taarsigassarsisitsinera 2,6 mia. kr.-uvoq

  • Bankip uninngatitai 8,7 mia. kr.-upput

  • Akiliisinnaassusaa, NEP-kapital ilanngullugu 41,1%-iuvoq

  • Siulersuisut naatsorsuutigaat ilanngaatissat ilanngaatigereerlugit 2024-mi naatsorsuutit inernerat katillugit 225-255 mio. kr.-ip nalaaniissasoq

Paasissutissat sukumiinerusut

Turið F. Arge, pisortaaneq, tlf: +298 230 678.