Aterput allanngortilerparput, taamaammallu ikioqatiseraatsigit. Ulloq 25. augustip tikillugu siunissami atissatsinnik siunnersuutinik nassissinnaavatsigut – taamaasillutillu 10.000 kr.-inik pinnanniuttunut ilaallutit.

Martsimi Savalimmiuni BankNordikip atini allanngortippaa, maannalu Føroya Bankimik (Savalimmiut Bankiat) ateqalerluni. Ateq taanna banki 1906-imi tunngavilerneqaqqaarmat aterineqarpoq. Ateq Føroya Banki Savalimmiuni ingerlatsinitsinnut tulluarneruvoq, taamatuttaarlu kissaatigaarput Kalaallit Nunaanni ingerlatsinitsinnut tulluarnerusumik ateqalissalluta.

Taamaammat maanna atissarsiorluta unammisitsilerpugut kikkulluunniit peqataaffigisinnaasaannik. Meeraaguit inersimasuuguilluunniit, uatsinni sullitaaguit sullitaanngikkaluaruilluunniit, sinerissamilu sumiluunniit najugaqaraluaruit unammisitsinermut peqataanissannut tikilluaqqusaavutit. Ajugaasoq 10.000 kr.-innassaaq.

Innersuussissut una toorlugu peqataasinnaavutit: www.banknordik.gl/nytnavn

”Kalaallit Nunaanni ingerlatsinerput assorsuaq tulluusimaarutigaarput. Ukiut tamaasa sullitanit nutaanit ornigarneqartarpugut, aammalu pikkorissunik misilittagartuunillu sulisoqarluta, ilaatigut allaat 2010-mi aallartikkattali sulisorisimasatsinnik. BankNordik ateq ajunngilaq, ukiorpassuarnilu taanna aterisimavarput, taamaattorli kissaatigaarput maanna immikkut ittumik kalaallisut ateqalerusulluta, Kalaallit Nunaanni ingerlatsinitsinnut, sulisutsinnut pikkorissunut, tamaanilu sullitarpassuatsinnut tulluaqqissaartumik,” Turið F. Arge, pisortaaneq, oqarpoq.