Ukiup sisamararterutaasa pingajuanni naatsorsuutit inernerat naammaginarpoq

BankNordikip ullumi 2024-mi ukiup sisamararterutaasa pingajuanni naatsorsuutit inernerat saqqummiuppai. Ataatsimut isigalugu ineriartorneq naammaginarpoq, akileraarutit sioqqullugit naatsorsuutit inernerat 119 mio. kr.-iuvoq, tassanngalu Kalaallit Nunaanni ingerlatsineq 32 mio. kr.-inik inerneqarluni.

Ingerlalluarnermut pissutaavoq uninngatitat taarsigassarsiallu annertusiartornerannit isertitat amerliartorsimanerat. Bankip aningaasaataannit iluanaarutit aamma ajunngeqaat. Sullitat inuussutissarsiortut privatillu ingerlalluarput, taamaammallu taarsigassarsiarititanik appartitsinernik utertitsineq ukiup sisamararterutaasa pingajuanni aamma pivoq. Siulersuisut naatsorsuutigaat ukiup sinnerani ingerlalluarneq ingerlaannassasoq, ukiullu naanerani akileraarutit ilanngaatigereerlugit inernerat 275-300 millionit nalaaniissasoq.

”Erniat inissisimanerat appariartorpoq piffissamilu aggersumi suli ernianik appartitsisoqaqqinnissaa niuerfimmi naatsorsuutigineqarluni. Tamanna ilaqutariinnut ukiuni kingullerni erniat qaffattarsimanerannit aningaasaqarnikkut ilungersortarsimasunut oqilisaataassaaq. Ataatsimulli isigalugu sullitavut ingerlalluarput, tamannalu aamma ukiup sisamararterutaani pineqartumi appartitsinernik utertitsinermi takuneqarsinnaavoq,” Turið F. Arge, BankNordikimi pisortaaneq oqarpoq.

Bankip atertaartinnissaa assorsuaq soqutigineqarpoq

BankNordik 2010-mili Kalaallit Nunaanni niuerfimmi akuusimavoq, ukiormannalu ukiup aallartinnerani bankimi aalajangiunneqarpoq Kalaallit Nunaanni immikkoortortaqarfitta atertaartinnissaanut piffissanngortoq, aterlu taanna Kalaallit Nunaannut tulluarsagaassasoq. Tamanna siulersuisutta Kalaallit Nunaanni sullitaminnik privatinik inuussutissarsiortunillu suleqatigiinnerminnik nukittorsaarusullutik suliniuteqarneranni  aammaikorfartuisuussaaq. Atertaarniarnermut atatillugu sullitat innuttaasullu tamarmik peqataanissamut qaaqquneqarput, tassami kikkulluunniit bankip atissaanik siunnersuuteqarnissamut periarfissinneqarmata. Bankip atissaatut siunnersuutigineqartut 3.000-it sinnerpaat, pilersaarutillu malillugit bankip atissaa ukiup naannginnerani nalunaarutigineqassaaq.

”Kalaallit Nunaanni atertaarnissatsinnut suleqatiginnikkumasut taama amerlatigisimanerat assorsuaq tupaallaatigalugulu nuannaarutigaarput. Inuppassuit taamatut tunniusimatiginerat assorsuaq pingaartipparput, akisussaaffimmillu tigusilluarluta suliassarput tamanna passunniarparput, sullitavut inuiaqatigiillumi tamaasa sullilluarlugit,” Turið F. Arge, BankNordikimi pisortaaneq oqarpoq.

Ukiup sisamararterutaasa pingajuanni naatsorsuutit inerneri pingaarnersiukkat

  • Akileraarutit sioqqullugit inernerat 119 mio. kr.-iuvoq
  •  Appartitsinerit sioqqullugit ingerlatsinerup inernera 66 mio. kr.-iuvoq
  • Taarsigassarsiarititanik appartitsinernik utertitsineq 6 mio. kr.-iuvoq
  • Bankip taarsigassarsisitsinera 9,1 mia. kr.-iuvoq
  • Bankip realkreditimik taarsigassarsisitsinera 2,6 mia. kr.-iuvoq
  • Bankip uninngatitai 9,4 mia. kr.-iupput
  • Akiliisinnaassusaa, NEP-kapital ilanngullugu 37,9%-iuvoq
  • Siulersuisut naatsorsuutigaat ilanngaatissat ilanngaatigereerlugit 2024-mi inernerat 275-300 mio. kr.-ip nalaaniissasoq

Paasissutissat sukumiinerusut

Turið F. Arge, pisortaaneq, tlf: +298 230 678