Piginneqatigiilluni inissiat
Piginneqatigiilluni inissiamik pisiguit andelsboligforeningimi piginneqataalissaatit. Tassa imaappoq inissiap atornissaanut pisussaatitaalissaatit, kisianni piginneqatigiiffiup ini pigissavaa.
Piginneqatigiilluni inissiaatitaarniaruit eqqumaffigisassatit ilaatigut makkuupput:
Allatsigit malinnaallutillu
Piginneqatigiilluni inissiat andelsboligforeningit namminneq utaqqisunut allattorsimaffiutaat aqqutigalugit tunisaasarput - taamaammat illoqarfigisanni andelsboligforeninginut allatsinniarina. Eqqumaffigissavat piginneqataareersut salliutitaallutik pisinnaatitaagajummata, pisinissamut ikinngutiminnulluunniit ilaquttaminnulluunniit ingerlatitseqqiinissamut pisinnaatitaallutik.
Aningaasaliineq
Piginneqataassutip aningaasalersornera banki aqqutigalugu pisarpoq, kreditforeningikkoorsinnaanngilaq. Tassa imaappoq taarsigassarsissaguit allanngorartumik erniaqartuussaaq. Taamatut taarsigassarsinermi erniat qaffariataarsinnaanerat eqqarsaatigalugu aningaasaqarnikkut inissaqartitsinissaq pingaaruteqarpoq.
Aningaasaqarnerit misissoruk
Piginneqatigiilluni inissiarsitinnak pingaaruteqarpoq illit nammineq aningaasaqarnerit andelsforeningillu aningaasaqarnera misissoqqissaassallugu. Assersuutigalugu taarsigassarsianut, ineqarnermut akiliutinut/attartornermulluunniit, imermut kiassarnermullu akiliutinut allanullu aningaasartuutaasartut misissortariaqassavatit.
Akiitsorsimappat?
Piginneqataasut aallaqqaatissatut akiliigaangamik andelsboligforeningip akiitsuinik akisussaasussanngortitaagajuttarput. Tassa imaappoq aallaqqaatissatut akiliutit sinnerlugu akisussaatinneqartussaanngilatit - taamaattorli ilaanni isumaqatigiissutit allaasinnaasarput, taamaammat peqatigiiffiup malittarisassiai misissortuaannakkit! Ineqarnermut akiliutigisassavit qanoq annertutigineranut ilaatigut peqatigiiffiup taarsigassarsiai apeqqutaasarput. Taarsigassarsiat allanngorartumik ernialersugaappata taarsigassarsiat allanngortinneqarlutik annerusumik akiliutitaqalissappata qaammammut akiliutigisartakkannut sunniuteqarnissaat naatsorsuutigisinnaavat.
Pappialartaasa tigunissaat puigorniaqinagu
Andelsforeningip pappialaataasa tigusinnaanissaannut pisinnaatitaavutit. Taakku tassaapput peqatigiiffiup malittarisassiai, naatsorsuutit kingulliit kiisalu ataatsimeersuaarnermit kingullermit nalunaarut. Immikkut ittumik ataatsimeersuaartoqarsimappat tassannga nalunaarut aamma tigujumassavat.
Sukumiinerusumik paasisaqarusukkuit
Piginneqatigiilluni inissiamik pisinermut atatillugu apeqqutissaqaruit bankimi siunnersortinnut attaveqarnissannut tikilluaqqusaavutit. Aamma Sullissiviup nittartagaani paasisaqarnerusinnaavutit.
