Toqusup pigisai

Toqukkut qimaguttoqarsimatillugu banki Eqqartuussivimmit nalunaarfigineqartarpoq, taava toqusimasup kontorisai, kortii, Netbankimut isumaqatigiissutaa, pappialanut nalilinnut toqqorsivii il.il. matunissaanut pisussaatitaasarpugut. Taarsigassarsianut, akiliutigisartakkanut allanullu nuussinerit aamma unitsinneqartarput.

Qimagaasunut tamanna ilaatigut aporfiusinnaasarpoq, ingammik aapparisaaguit qimagussimasorlu peqatigalugu aningaasaqarnerit ingerlassimallugu. Kontorisassinnut isernissat, kortit atorsinnaanissaat akiligassallu akilersinnaanissaat suli pisariaqartissavat. Taamaammat attavigisariaqassavatsigut, pitsaanerpaamik aaqqiinissarput anguniarlugu.

Pigisat qanoq aaqqissuunneqarnissaat kikkullu kingornussisussaatitaanerat Eqqartuussiviup aalajangissavaa. Tamatuma kingorna pigisanik agguaassinermut uppernarsaat tunniunneqassaaq, kingornussisut toqukkut qimagussimasup pigisaanik atuisinnaanissaannik pisinnaatitsisoq.

Pigisanik agguaassinermut uppernarsaat tunniunneqartinnagu banki toqusimasup kontoanit aningaasanik tunniussisinnaatitaanngilaq, taarsigassarsianut aalajangersimasumilluunniit akiliutigisartakkanut akileeqqusaanngilaq il.il.

Qimagussimasup kontoanut isersinnaatitaaneq

Toqukkut qimagussimasup bankimi kontoanut isersinnaassaguit uku bankimut tunniunneqaqqaassapput:

• Pigisanik agguaassinermut uppernarsaat
• Kingornussisussat tamarmik kikkuunerannik uppernarsaatit
• Pigisat kingornussisut akornanni qanoq agguataarneqarnissaannut akuersissut, kingornussisussanit tamanit atsiorneqarsimasoq
• Kingornussisussat tamaasa sinnerlugit kingornussisussap ataatsip pigisat isumagisinnaassappagit pigisanik agguaassinermi pisinnaatitsissut suliarineqartariaqarpoq