Apeqqutigineqarajuttut Netbank

Ugguuna Netbankimut nutaamut isersinnaavutit. Qaammatini aggersuni atuisut tamarmik NemID-mit MitID-mut nuuttussaapput. Nuuttussannguleruit allagarsiumaarputit. Nuunnissavit tungaanut NemID isissutissatut atorallassavat. Nooreeruit isileraangavit MitID atortuaannalissavat.

Kontoit tulleriiaarneqarnerat allanngortinniarukku siullermik saqqaani kontoit talerpiatungaani tikkuutit tooqqaassavatit. Taava tikkuutit musiluunniit atorlugu tulleriiaarneqarnerat allanngortissavat

Qulaatungaani qeqqani atuisumit atuisumut nuussinnaavutit. Aterpit saniani tikkuuteqarpoq, taanna tooriarlugu atuisoq nuisikkusutat toqqassavat.

Atuisutut normut kontoit killiffianik ilisimatitsissummi ersittarpoq. Kontop killiffianik ilisimatitsissutit allagaatillu allat takuniarukkit qulaani teqeqqumi talerperlermi "Aktiviteter" tooqqaassavat. "Arkiv" toorlugu kontop killinganik ilisimatitsissutit allagaatillu allat takukkit. Atuisutut normut kontoit killinganik ilisimatitsissummi qulaani saamiatungaani aterpit ataani allassimavoq.

Tuugassaq tungujortoq tikkuutitalik naqqani talerpiatungaaniittoq toorlugu akiliinermik/nuussinermik pilersitsissaatit. Immersugassat immersoriarlugit akiliineq akueriumallugu "godkend" tooruk.

Tuugassaq tungujortoq naqqani teqeqqumi talerperlermiittoq tooruk. Immersugassani qulaaniittuni pingasuni "Udland" toqqaruk. IBAN/Kontonormu immersoruk, pisariaqarpallu aamma BIC/Swift. Akiliineq pillugu paasissutissat immersukkit - tigusisussap aqqa najugaalu ilanngullugit. Aningaasat amerlassusissaat allaguk nunallu sorliup aningaasaatai pineqarnersut ilanngullugu, "godkend" toorlugu akiliineq akueriuk.

Qulaatungaani saamiatungaani qinigassat akornanni "betalinger" toqqaruk. "Betalingsaftaler" tooriarlugu "+ Opret BS-aftale" tooruk.

Qinigassat akornanni "Betalinger" tooriarlugu "Betalingsaftaler" toorukku aalajangersimasumik nuussisarnitit BS-ikkullu isumaqatigiissusiatit ataatsimut takusinnaavatit. Uani BS-ikkut isumaqatigiissusiatit aalajangersimasumillu nuussisarnitit tamaasa ataatsimut takusinnaavatit.

IBAN-normut BIC-kodelluunniit nuussinermut atatillugu atorniarukkit kontop pineqartup atugassarititaasa allattorsimaffianni takusinnaavatit. Konto pineqartoq toqqarukku, taava qulaani teqeqquani talerperlermi toorneeqqat toorlugit "kontodetaljer" iserfigigukkit IBAN-normua BIC-kodealu nuissapput.

Konto paasisaqarfigerusutat toqqassavat. Toorneeqqat pingasut qulaani teqeqqumi talerperlermiittut tuukkit, taava "kontodetaljer" toorukku atugassarititaasut nuissapput.

Netbankip saqqaani toqqarsinnaavat kontotit grafitut (assilianngortillugit) allattorsimaffittulluunniit nuisinniarnerlugit. Kontoit qulaatungaani teqeqqumi talerperlermi titarnerit pingasut kipparissuaqqalluunniit sisamat tuuginnassavatit. Netbankimut iseqqikkuit iseraangavillu toqqakkat naapertorlugu nuisinneqartassaaq. Qanoq nuisinneqartarnera qaquguluunniit allanngortittarsinnaavat.

Massakkuugallartoq ajoraluartumik netbankip nutaap iluani NemKontomik allatsitsineq ingerlatsinerlu pisinnaanngillat. Piaarnerpaamik iluarsinissaa sulissutigaarput, iluatseriarpat ilitsersuut una iluarsiumaarparput. Aaqqinnissaata tungaanut NemKontomik allatsitsineq ingerlatsinerlu netbankitoqqami pisinnaapput. Ilitsersuut ataaniittoq imaluunniit pdf-itut kakkiussaq takuuk.

1. Netbankitoqqamut ugguuna iserit
2. ”Aftaler” qineruk
3. ”Funktion” qineruk
4. ”Tilmelding eller framelding af funktioner” qineruk, kingornalu ”Tilføj eller fjern aftale”
5. ”Nemkonto” qineriarlugu naammassiumallugu ”OK” tooruk

 

Netbankikkut ajornaatsumik, tatiginartumik, isumannaatsumillu siunnersortit allaqatigisinnaavat, allagaatinillu nassissinnaallugu. Siunnersortit allaffiginiarukku saamiatungaani qinigassat akornanni "Beskeder" toqqaruk. Qulaani talerpiatungaani teqeqquaniittoq "privat" toorukku siunnersortivit kisimi allatat takusinnaassavaa.

Uatsinnit allagaataatitit takuniarukkit qulaani teqeqquani talerperlermi "Aktiviteter" aqqutigalugu nassaarisinnaavatit. "Arkiv"-ip ataaniipput kontoadviseringit, kontop killinganik ilisimatitsissutit, allagaatillu siornatigut atsioreersimasatit tamarmik. Ujarliutit atorlugit allagaatitit tamaasa takulluarsinnaavatit.

Kortit tammaagukku, atornerlunneqarsimanissaanilluunniit pasitsaassisimaguit, taava Netbankikkut ajornaatsumik isumannaatsumillu matutissinnaavat. Saamiatungaani qinigassat akornanni "mine kort" qineruk. Taava "Vælg" tooriarlugu kortip matutinniakkavit nalaani "Spær kort" tooruk.