Aningaasaliisunik illersuinissamut malittarisassat
Pappialanik nalilinnik, valutaproduktinik kiisalu derivatproduktinik niueraangavit aningaasaliisunik illersuinissamut malittarisassat ilinnut atuuttarput.
Aningaasaleeriaaseq - investeringsprofil
Aningaasaliisunik illersuinissamut malittarisassat naatsumik imarivaat siunnersorneqarniaruit illit nammineq aningaasaleeriaasissat aalajangiuteqqaartariaqaripput.
Aningaasaleeriaatsip nassuiarneqarnerani ilaatigut paasissutissat makku ilaassapput:
- Aningaasaliinissannut piffissaliussaq
- Aningaasaliinerpit siunertaa
- Siornatigut aningaasaliinikkut misilittakkatit
- Nalorninaatit tungaasigut inissisimaffiit
Sullitat immikkoortinneqarneri
Sullitatut immikkoortut ataani taagorneqartut ilaannut ilanngunneqassaatit. Tamanna pissaaq pisariaqartitatit naapertorlugit siunnersorneqarnissat qulakkeerumallugu. Sullitat immikkoortui pingasuupput:
- Detailkunder (sullitat ataasiakkaat, privatit)
- Inuussutissarsiutigalugu aningaasaliisartut (Tassaagajupput inuussutissarsiortut annertuumik sullittakkat)
- Illuatungerisat akuerisat (ass. aningaaseriviit pensionsselskabillu allat)
Detailkunder aningaasaliisutut qaffasinnerpaamik illersorneqartarput, illuatungerisallu akuerisat aningaasaliisunik illersuinissamut malittarisassanit illersorneqaratik.
Niuerfik
Pappialat nalillit ilisimasatit misilittagaqarfigisatillu naapertorlugit niuerfiup aalajangersimasup iluaniittussatut innersuunneqassaatit.
Niuerfippit avataani aamma niuersinnaatitaavutit, kisianni taamaalioruit siunnersorsinnaanallu siunnersoqqusaanngilatsigit.
Siunnersuineq
Aningaasaliisunik illersuinissamut malittarisassani paasissutissat atuuttuaannartut ataasiakkaanullu innersuussinerit (siunnersuineq) immikkoortinneqartarput.
Aningaasaleeriaatsit ilisimanngikkaluarlugu paasissutissanik atuuttuaannartunik tunisarsinnaavatsigit, kisianni aningaasaleeriaatsit ilisimaqqaarlugu aatsaat ilinnut innersuussisinnaavugut.
Paasissutissat atuuttuaannartut tassaasinnaapput niuerfinni pissutsinik misissuisimanerit paasissutissallu. Ataasiakkaanut innersuussinerit aningaasaliinissamut siunnersuutaasarput, taakkulu aningaasaleeriaaseq aallaavigisariaqarpaat.
Aningaasaleeriaaseq nutarsartuartassaaq
Illit aningaasaqarnikkut inissisimaffiit annertunerusumik allanngorsimagaangat aningaasaleeriaatsivit allanngorsimanera nalunaarsortassavat, pissutsit atuuttut aallaavigalugit - illit pisariaqartitatit naapertorlugit - aningaasaliinitit siunnersorneqarnitillu ingerlaniassammata.
