Soraarnermusiat tigunissaat

Soraarninngornermi ileqqaakkat tiguneri

Pensionskontoqaruit ileqqaakkavit katillugit qanoq amerlatiginerat, aammalu allanik soraarnermusiaqaruit taakkua qanoq tiguneqarneri apeqqutaallutik pensionskontomi ileqqaakkavit tigusalernissaat aaqqissuunneqassapput. Inatsisit malillugit pensionimut ileqqaakkavit minnerpaamik 50%-ii livrentetut tigussavatit, tassa imaappoq toqunissat tikillugu soraarnermusiaqarnissat qulakkeersimassaaq. Ileqqaakkat sinneri naafferartumik tiguneqarsinnaapput, sivikinnerpaamik ukiut qulit iluanni.

Soraarnermusiassanut ileqqaakkatit 700.000 kr.-init ikinneruppata tiguneqarnissaannut atatillugu immikkut malittarisassaqarpoq. Tassani livrente piumasaqaataanngilaq, aammalu 100.000 kr. tungaanut ataatsikkut tiguneqarsinnaallutik. Ileqqaakkat sinneri qaammammut 4.500 kr.-inngorlugit tiguneqartassapput.

Pensionskontomit aningaasat tigugaangakkit Kalaallit Nunaanni isertitanut akileraarutaasartut nalinginnaasut atuuttassapput. Nunanut allanut nuussimagaluaruilluunniit tamanna aamma atuutissaaq.

Toqusoqarnermi ileqqaakkat tiguneri

Pensionskontomi ileqqaakkatit nungutsinnagit toqussagaluaruit aaqqissuussineq kingornussisussanut ingerlateqqinneqassaaq. Kingornussinissamut tunngatillugu salliutitaqarsinnaatitaavutit, taamaasillutillu soraarninngornissannut ileqqaakkavit kimut tunnissaat aalajangersinnaatitaajuaannarpat. Salliutitsinermi aalajangersimasunik malittarisassaqarpoq, salliutitaasinnaavoq assersuutigalugu nuliat uiilluunniit, aapparisat, qitornalluunniit.

Siunnersortivut pikkorissorsuupput, taakkulu periarfissatit saqqummiutissavaat suleqatigalutillu ileqqaakkat tigunissaat ilinnut nuannaarutaanerusussaq nanissallugu.

• Soraarnermusiassanut kontomi salliutitap allanngortinnissaa