Aningaasaqarnikkut isumannaallisaaneq

Aningaasat soorunami inuunermi pingaarnerpaajunngillat, taamaattorli aningaasaqarnikkut aalajaatsumik toqqissisimanartumillu ingerlaneq ulluinnarni inuunitsinnut sunniuteqartaqaaq. Aningaasarsiat amerlasoorsuunissaat tassani pingaarnerpaajunngilaq, kisiannili atuinitta malittaralugulu aqussinnaanissaa.

Aningaasaqarnermut tunngatillugu nuanniitsumik tupaallatsinneqarnissaq pinaveersaartikkumallugu aajuku siunnersuutit.

Atuineq aaqqissuullugu

Missingersuusiornissaq inuunermi pisariaqavinngikkaluarpoq, taamaattorli iluaqutaasaqaaq. Tassani aningaasaqarneq tamarmi aaqqissuullugu allattorneqartarpoq - aningaasartuutit aalajangersimasut, soorlu ineqarnermut, taarsigassarsianut, telefonimut, sarfamut, kiassarnermut, ilaasortaanermut il.il. kiisalu aningaasartuutit allanngorartut, soorlu nerisassat, tunissutissat, feeriat misigisassallu. Aningaasartuutit allanngorartut qaammammut qanoq atuiffigitigisinnaanerlugit arlaatigut killilernissaat iluaqutaasinnaavoq. Aamma qulequtsersorlugit aalajangersorukkit iluaqutaasinnaavoq, soorlu nerisassanut 4.000 kr., tunissutinut 300 kr. il.il. Taamaalioraanni aningaasaqarneq malinnaavigiuminarnerusarpoq atuinerlu aqukkuminarnerulluni. Toqqissisimanarpoq, taamaasillutillu isumaalunnitit annikillissapput.

Akiliutinut aalajangersimasunut kontoqalerit

Akiliutinut aalajangersimasunut kontoqarlutit qaammatit tamaasa aningaasarsianut kontonninngaanniit kontomut tassunga aalalajangersimasumik ikisisarit. Taava akiligassat aalajangersimasut akilerneqareeraangata qanoq aningaasaateqartigisassanerlutit nalussanngilat, aammalu akiligassatit aalajangersimasut qaammatit tamaasa akilerneqartassallutik. Aningaasartuutitit ukiumut tamarmut siammartinneqassapput, taamaasillunilu aningaasaqarnerit aalajaannerulissaaq, qaammatit tamaasa assigiiaarnerulluni.

Ileqqaagaqarit

Feeriat, juulli, inuuissiortut, tamakku aningaasartuutaasartut ilagiinnarpaat. Taamaammat qaammatit tamaasa aningaasanik immikkoortitsisarneq iluarsinnaaqaaq. Tassungalu ilanngullugu naatsorsuutigisimanngisanut aningaasartuutit. Errorsivik aserorpat, biilit iluarsaatassanngorpata, smartphonep igalaajusartaa sequmittoq il.il.

Isertitat malillugit atuineq

Taama oqarneq ajornanngikkaluaqaluni malikkuminaassinnaavoq. Eqqaamaannariuk illit aningaasaqarnerpit isumannaatsuunissaa tassani pineqarmat, aammalu isumaalunnerujussuup piginnginnissaa. Tamakku angujuminarnerpaassapput aningaasaqarnerit ilisimagukku, tulluuttumillu niuerniartaruit. Taamaammat niuerniariaatsit eqqarsaatigilluariuk, aningaasaqarnerpillu artugaanik pileritsariataarlutit piseriataarnaveersaarlutit neriniartarfinnilu nerisassarsinaveersaarlutit. Sapaatip akunneranut nerisassatit pilersaarusiukkit, pilersaarusiallu malillugu niuerniartarlutit.